ENEKO ETA JON

eneko:

ostiralek ostiral izaten jarraituko dute

baina mezu hauekin bat beharbada ez

nire kemena bukatu delako ere

inor ez dudalako Bagara behartu nahi

etorri nahi duenak, nahi duelako etor beza

ez ni hona natorrelako ostiralero:

lotsa sentitzen dudalako ni ere, ez pentsa,

behin eta berriro mezu hauen bidez nirera deitzen zaitudanean

nire deiadarrak ispilu aurrean entzuten ditudanean,

nire lana ikus dezazun deitzen zaitudanean

hemendik oihuka egiten dudanean

behin, eta berriro

nobelari lehentasuna eman nahi diot ere (hau agian aitzaki bat da)

zirriborroko berrehun orrialdetara lanera noa

laster idazle bat naizen edo ez jakingo dugu

ez dakit lortuko dudan

ostiralero zu barik isiltasunean,

baina saiatuko naiz.

bitartean…

poema bat, bi eta hiru

nire zeruen aurrean

beste askoren artean.

jon:

Ai Eneko

errudun sentitzen naiz

ez dizudalako askotan ezer ere esaten

zure mezu beti biziak irakurri ostean.

barkatu nire harrokeria

nire seriotasun falta.

Ez dut ulertzen zergatik

dituzun zalantzak:

idazten duzu

zure testuek argia ikusten dute

eta irakurria zara

jendeak zure testuak irakurtzen ditu

(nik oso gustora gainera)

ni konpainia onean sentitzen

naiz zure gauzak irakurtzen ditudanean

nahiz eta batzutan apur bat triste ere jartzen naizen

(gauzak benetan esaten direnean horixe baita arriskua...

eta hori literatura baino geihago da)

ez euki zalantzarik

idazlea zara zu

ederra gainera.

Musu handi bat

zuretzako eta zure

testuentzako

eneko:

badakizu zure hitzek

beti

oihartzun handia dutela nigan

nire tripa goseti hutsetan

frontoiaren bi paretak bailitzan

aurrera eta atzera datoz

zure hitzak

fitolako poemekin bezala

beste behin ere

zure hitzak ikasiko ditut

hauek gainera

nire zauriak eta ziurtasun-ezak

sendatuko omen dituztelako

gaurkoan are gehiago

gaurkoan

etxeko salda beroa dakarkidazulako

ez duzu errudun sentitu behar

ezta pentsatu ere…

esaten duzun bezala

irakurtzen nauzu

eta horrek balio paregabea du niretzat

nik behar desberdinak ditut

Pako Aristiren liburua irakurri eta hari idatzi beharra

Karmele Jaiorenarekin berdin

Mursegoren diskarekin ere

Rafa Ruedarekin, antzera…

Mikel Urdangarin, Mikel Markez, Bernardo Atxaga,

Maialen Lujanbio, Andoni Egana

Kirmen Uribe,

Gorka Urbizu, David Gonzalez eta Galder Izagirre (Berri Txarrak)

Aitor Gorosabel (su ta gar)

Jon Gerediaga

Mikel Gonzalez (amasay)

Joseba Barrenetxea

Tom Hagen

Gorka Arrese

Edorta Jimenez, Irati bere alaba

Anari…

eta zerrendak jarraitzen du…

letania zahar batelez

behar hori sentitzen dudalako

zuoi, artistoi, idazten dizuet

ezin diot munduari berdina eskatu

mundua ez delako nire tripak bezalakoa

mundua ez delako hitzen oihartzun

mundua ez delako frontoi berde bat

eskerrik asko idazleago sentiarazi nauzulako

benetan, 

bihotzez,

burmuinez.

gora bihotzak!

nirea igo egin duzu, egon zaitez ziur